يقوضني يهددني بأنه عليه يقيم الحد

وانا بين الفراغ والمد 

ممدود ومسلوخ من نفسي

ونـِفسي من نـَفسي يخرج

 حد غيري فيا ينافسني

يامين فيا يباريني

ويهديني لقولــِة لأ

وللحق وبعترف بغرور

ومش معزور

وبدال علي نفسي ما الف وادور

انا محبوس جوه نفسي بنفسي

وشرنقت روحي علي روحي 

بحرير يأسي

ولما لقتني بغلبني فزعت

ووزعت جنودي علي ابوابي

خايف علي وجعي اللي في جنابي

واحبابي رافعين بالغدر سكيني

وشياطيني والمتأسلمين علي ديني

مابين الحضور قاعدين

معازيم في جنازة فرح

بيزغرطولي ترح

وسرح بيا  وبيهم تــِعبان الزمن

ولدغني وانا في عقر داري

ولاداري

واتسرسب السم وسكن دمي

وذاد ألمي وطال همي

وعفريتي اللي جوايه بيصرخ

عايز ينسلخ مني

وانا باقي علي العشرة

ومغلولة في الشق صوابعي العشره

ومش لاقي لنفسي ولا ليـِه ولالياَ

 فياَ مكان أمن وحواليـّه

باقي حواسي  رفـْـضـّني

وللجني اللي ساكني مواليّة

بايعوه علي هجري وعَاذلـِّيـني

والصبرفاض بي ومعدش بيصَبر

ولا ضامن يطول الوقت أو يقصر

والموت يداعبني يلاعبني

لعب القط ويا الفار

لاغلبته ولاغلبنى

ولاخيار ليا ولامَـــنـْـفـَــذ فرار

ولا قادر اقول الأااااااه

ولابيها مستريح يااااااااه

  يااااااااااااااااه

ليه الأااااااه مابقتش بتريح

(طاهر الصوفاني)

عليل علي فراش الهوي  قالوا النسا مالك 

كان الغرور ينصفك والعشق راس مالك

محتاجة مش عايزه يادنيا غناجة

يكفيكي مني المنية تكفيني بترابك 

دمي انخلط بالسموم والعلة سكنتني

سمع القريب شكوتي للشكوي بَكِتني

قالوا الأحبة أطبة أنا قولت من بختى

الجنازة حارة والميت لامؤخذه

وصوات وعويل وعملتم أزمة

وكلب ب يلهث جاري ورا  معزه

وناس بتعزي ماليهم لازمة

ياميت ندامه علينا وحبه

جاتنا الخيبه وراها الكُبة

علي مابنفهم نبقي في طامة

رُشوا فسَوخة  علينا وشبة

واحنا يتامي مابين اهالينا

طول مالسنا ماساكت فينا

خزقوا إيدهم جوا عيوننا

وخبوا السر دا جوه عيوبنا

اه يازمانا يامظلوم عنوة

نرمي بلانا تملي عليك

نعمل كل مصيبة وبلوة

ونقول قسمة وراجعة اليك

طب مكتوب وعرفنا نهايته

زى الأضحى استني ضحية

قاموا دفعوا له وعرفم غايته

شاف اللحمة جاتله هفيه

طيب يعني ياعم طوقان

اللي بياكل وحده بيزور

لقمه ل ساميه وابن صوفان

روض فيلنا  لو يتهور

اه لو نعرف معني الثورة

اه لو تطلع عينا الحمره

اه لو يصحي الساكن فينا

دا احنا سكاري ومن غير خمرة

فين النعرة الخايله مابينا

فين مكنونا وفين مجنوننا

قال عرباوي وادريس هابري

هيرجعوا مكتوب علي ديننا

حطه يابطه يافيل زلبطه

أصحوا ياعالم حبه وفوقم

احنا في زمن الحطه يابطه

جوا ماردنا اتحبس القمقم

جوا ماردنا اتحبس القمقم؟

(طاهر الصوفانى )

أهلا ياعم رمضان

يا شهر التوبة والغفران

شهر الصلا والعبادة

وترك المعاصي العيان؟

دا اللي من الناس يبان ؟

أهلا ياعم رمضان

يا شهر الأمان

فجأة فيك كل البشر خلان

إخوان لاحقد ولاعداوه ولاحسد

كأنهم ملايكة الرحمن

أشي موائد أكل

 وأنوار زينه وكستبان

الكل بعيد عن المعاصي والعصيان

دا اللي من الناس يبان

أهلا ياعم رمضان

شهر واحد فيه بنعرف ربنا

طب وباقي السنة ؟

مين ربها ؟

مين كان لها ؟

مين يطعم المساكين

بعد ما تعدي مين

حداشر شهر مين

ياما ناس جياع وعطشانين

ياما ناس حياري مظلومين 

مين يعمر المساجد بالخشوع

وهي بتشكي ربها هجر الجموع

اهلا ياعم رمضان

شرفتنا نورتنا قدنا الشموع

استقبلناك بالغالي كله وبالدموع

علقنا زينه ع البيوت

فوانيس عيالنا نورت

صيني وهندي وبدرشيني

مرسوم عليها بحبر شيني

من كل صنف وكل لون

بأغاني جامدة جديدة طحن

وأكل يملا ألف صحن

يليق كتير بحضرتك

ومسلسلات فوازير كتيرة وفر فشه

صواريخ تفرقع

وعيال تبرطع

والكل أخر نعنشه

ورفعنا برقع الخشا

جبنا الكنافة والقطا يف والحشا

اهلا ياعم رمضان

سلمنا علي كل الصحابة من بعد الجفا

سجاجيد بيوتنا والملايا وللحفه

 فرحانة بيك ومزهزهه

فرحانة حتي الأرصفة

كتير أغاني من زمان نسمع لها

والكل بيردد معاها

 ويغنى ويقول لحنها

مرحب شهر الصوم مرحب

وأهلا رمضان

ووحوي  يا وحوي

اهلا بك يا شهر الوفا

يا شهر المحبة والدفا

مش هو دا رمضان اللي بنعرفه

مش دا اللي كل الناس بيه بتوصفه

اهلا ياعم رمضان

يا ضيف عزيز

علي ناس مابيقدروش معني الضيافة

يا اغلي م اللي يستقبلوك بكتير هيافه

وسامحني انا لو تعديت حد الخفافه

اللطف منك مطلبي

وللجميع عفو الأيافه

*****

طاهر الصوفاني

هي كانت با دية خير

والله أعلم بنيات البشر

ثورة نور

ثورة نار

ثورة تيران

ثورة حمير

ثورة بشر

بشر صحيح بشر

وبقر بوجوه بشر

اختلط فيها الحابل بالنابل

الجماد والطير

الشر والخير

نجيب وعبدا لناصر والبنا

وابوجهل وابو لهب

ياللعجب

معقول يجتمعوا في عمل واحد

خير اللهم اجعله خير

النور يتولد م العتمة

واليي ناوي الصوم

ميبصش لباقي القوم

ثوره غنية وذكيه

ثوره غبية همجية

ثورة شيوخ واعيين

وأبالسة ملاعين

فيها ملايكه

بوشوش شياطين

وشياطين بن أدمين

متقد رش تقول دا مين ودا مين

ثوره عمت ع الغلابة بالخير

وسلبت ونهبت حقوق الغير للغير

ثوره يباركوها شيوخ الجوامع

ثورة نسا ومدامع

طيور جارحه بلا ريش

– خفافيش

أفندية بطرابيش

وحرامية وحرافيش

ثورة دراويش

وأباطرة وملطيش

ثورة جيش

ومحششين وحشيش

لواءات وجنرالات

رتب

ودرجه شاويش

ماشيين في صف واحد تبيش

مشاعر فرح وحزن طاغي في قلب واحد

قلب أمه تفرح وتبكي لأي شيء

تضربها علقه الصبح بنبوت

وتصالحها أخر اليوم بكوز دره

أو شويه توت

لاتعرفلها حزن من فرح

ولاعدو من حبيب

الثورة راحت

والثروة راحت

والأمة تاهت

وعقولنا ساحت

وناس كتير لساها بتسأ ل

هي ثوره ولا انقلاب

دي سنين هباب

*****

(طاهر الصوفاني)

وخوفت عليكي من نفسي

ومن يأسي

قطعت بأيدي شراييني

وقولت في يوم يانور عيني

هتنسيني

وإتمنيت… تسامحيني

ولما تجيني… تشوفيني

وانا بين الأمل واليأس

أجيب اللوم علي حالي

وأحوالي تعزيني

وأكشف  روحي قدامك

ويصغر شأنى بمقامك

 وتتفتّح بيبان وبيبان

تشوفي المستخبي يبان

ويظهر كل تكويني

وتخلى عضامي من لحمي

وتتكسر كرات دمّى

وتزرف دمعتى همّي

وتخجل نفسي من نفسي

ويفضح حالي أحوالي

واتوه منك في تفاصيلي

وينشف همي في عروقي

وتغرق شمسى في شروقى

وادوب من نظره من عينك

وليه ياعين.. تعاتبيني

وتظهر روحك السَمحة

بهمسه ورعشه من إيدك

بترحم حالي وتزيدك

ويغريني السماح فيكي

وياما كتير.. سامحتيني

وتصحي ظنوني وف لمحه

أميل حبه علي خصرك

أدوق الشهد من وصلك

تـُسكن فيا براكيني

يقوم يفضحني مكنوني

وثورة حزنى وجنونى

بتحكيلك وتشكينى

فـَتبكى الروح ف أحضانك

وارمي جروحي في جروحك

يحن حنيني لحنيني

ترد الروح لموطنها

وراسي تختفي في حضنك

وترسىَ حواسى في مكانها

منايا الموت بقي يجيني

ولا يجيني !!!!!

(طاهر الصوفانى)

ولساكي صامدة برغم الظروف

ومهما اشتكينا ومهما انكوينا

باسمك ننادي بحبك نطوف

عليه انفطرنا وبيه اتولدنا

ولو انشطرنا ميات أو ألوف

برغم الأسيه

برغم اللي بيه

ويعلم ألهي معاني الكلام

عليكي السلامة يا أرض السلام

برغم المكيدة بدعوى السلام

ورسمة خريطة بكدب اللئام

مش خارطة

دي ورطه

وبلوه ابتلينا بعرض الطريق

بأيدنا قتلنا الرفيق والصديق

بأيدنا نقاتل

بأيدنا نناضل

نسلم و نخضع

أو نعلا سحاب

نبرطم ونشجب

نحاور ونكدب

بهمزه ولمزه ولف ودوار

برغم حصارك وسوء الحوار

صامدة يا غزه ماقولتي الفرار

برغم ميوعتي شقاوتي وتفاهتي

لساني اللي ساكت

رجولتي اللي باهته

برغم المعاهدة اللي طقت وضجت

برغم الفضيحة باسم المودة

قلوبنا ياغزه ما عادت بريئة

دموعنا البخيلة دمانا اللي باردة

برغم أسوارك وطعم المرار

مازلتي يا غزه صمودك فنار

وانا برغم قربي بحكم الجوار

اكتفيت المشاهدة كأنك مزار

أيدي في ميه باردة ماحاسس بنار

برغم المشاعر وضعف المعاني

قلبي اللي شاعر بحبك يعاني

بحبك ياغزه يا مهد الرسايل

يا عمري اللي ضايع يا دمي اللي سايل

ياست التسامح ياروح الأخوه

ولو يسمح زماني

أقولك كمان

ولويسمح مكاني هقول للزمان

دي غزه الأبية قويه ذكيه

الحب اللي بينا دا  كان ياما كان

وليه هانت علينا

وعليها ما هان

(طاهر الصوفاني )

وبما إني مفلس اسمحولي أعيده

إدراج قديم حبيته من قلبي

علمني معني الحب وأكون إليك شاكر

وهات لي قلب أتنصف من زمرة العشاق

من بين جموع البشر تقدر تكون فاكر

جمع القدر قلبين إلا اللي أسمه فراق

عتقتها في راسي وشربت منها كاسين

ولما انكسر كاسي طاطيت مليت الأيدين

والمر طعم العسل يادواقين الشراب

والسُكر أصله كده كما سَرقة السكين

*********

طاهر الصوفاني

*************

الدنيا وعميلها وحكاويها

من فينا بيرضي بقدرها

ديماً بتخدنا بناصيتها

وتغير سيرنا لمسارها

ولامره بتيجي علي هوانا

ولامره بترسي لمراسينا

******

ماهي دنيا وسايره بمراكبنا

ريح عاتي يكسر في شراعنا

موجه عالية تهدد نواصينا

تعصف بحياتنا وتقلعنا

من جدر الأرض وترمينا

ولامره بتيجي علي هوانا

ولامره بترسي لمراسينا

**********

بنعافر وفي عز المحنه

بتحن الامنا لمطارحنا

ب نطبطب ع الدنيا القاسية

نرضيها ماترضي تصالحنا

ماهي دنيا وسايره بينا

ولامره بتيجي علي هوانا

ولامره بترسي لمراسينا

***********

لو روحنا ولا جينا

ديما لينا رجوع

فيه ناس في الدنيا لينا

قيدين لينا الشموع

ورجعنا مالتقينا منهم غير الجراح

والنور اللي ف عنينا أتاريه دموع شموع

ماهي دنيا وسايره بينا

ولامره بتيجي علي هوانا

ولامره بترسي لمراسينا

 *******

وشكرا للجميع

ولكل منا ظروفه وطقوسه الخاصه

فارجو من يشرفني هنا ان يتطلع الي هذا جيدا

انا غير ملزم برد الزياره

 عفوا ولطفا واهلا بكل زائر يشرفني بمدونتي

(طاهر الصوفانى)

* مــــــــــــزه *

  بهيه ياما قالوا عليها

ياما ناس غنوا ووصفوا فيها

ياما قالوا عنها كـتيـر أشعار

قالوا ملهاش لاعزيز ولا صاحب

قالوا وقالوا - اشمعنا لساني

بهيه بتاعتي دي عالم تاني

أنا هوصفها وانتووا وزوئكم

أصلي فقدت الزوء من مدة

هي بتشبه زمني الجاري

بتعرف هندي وصيني ويـمني

أصلها دارسه في جامعه بامبه

بتعرف بردوا تقول أحيييييه

أصل مامتها جايه من بحري

بس خسارة وعيني عليها

جوا المطبخ ملهاش حيله

أصل الحيلة دلع العيلة

وعيني باباها ماعندوش غيرها

لكن اللبس أو في الموضة

أوعه لوشك واوعه تشوف

المزه جمالها دا فوق العادة

وطالع حبه لفوق الركبة

ولا قوامها ياحوستي السوده

قايم نايم تحلم بيها

أنا بوصفها وانتووا وزوئكم؟

أصلي فقدت الزوء من مدة

وجاني مكانه الحاسة السادسة

بيقولوا عنه مرض العصر

هي بتشبه مخلوق نادر

يمكن فار أو يمكن قطه

كانوا زمان بيقولوا قال بطه

لم يشوفوا واحده جميله

ودي لاهي بطه ولازا  لوزه

دول بيقولوا- أبصر-  مُزه

ماشيه بتجري- بنت الهبله

وشايله وراها- حتة شنطه

كنا زمان بنقول زلمكـه

لما نشوف الشنطه بتلعب

أما المُزه عليها عصعوصه

حتة لحمه - ناشفة وفحمه

تحت كـتافها - بشبر وحته

عالجنبين كان- فيه لمونـتيـن

بس الظاهر- بعد العصر

بيورموا منها - بقرصه وعضه

وانا بوصفها وانتووا وزوئكم

أنا وهجرني الذوق من مدة

قولت أتكلم واحكي معاها

أرغي والاغي واجرب نفسي

كنت زمان لو حته طريـه

عدت منى أبات لِيلي حسرة

طيب أجَرب - هاخسر إيه

قولت صباحوا– بصت بصه

غصب  عني - شوفت عنيها

كان فوق منهم شده وكسره

حاجه جديده اسمها تاتــــو

أما عيونها حمامه وراقده

لما لا غيتها– تؤ تؤ لاءه

مسكت أيديها تؤ تؤ لاءه

ولسه هجر في خيبتي وهمشي

قالت استني بهمسه ولهفة

إنِت الأول –عندك موكنة

هات مالأ َخر– قصر حبه

قولت في نفسي وقعت في ورطة

بس ساعتها فهمت المعنى

وليه بيقولوا الحلوة دي مُزه

ومش راح اكمل واحكي الباقي

إلا لو اعمل طاسة الخضه .؟

(طاهر الصوفانى)

ادراج قديم

وفرصة وانا مانع التعليقات اطول لسانى شوية

هههههههههههههههههههههه